Road safety education sa mga paaralan, aprub!
ANO ba talaga ang sikreto para malutas ang lumalalang trapiko sa Metro Manila?
Ayon sa pag-aaral ng Japan International Cooperation Agency (JICA), ang kakulangan sa disiplina ng mamamayan ang pangunahing dahilan ng matinding trapiko sa bansa.
Karaniwang nakakakita tayo ng mga pasaway na driver, jaywalker, vendor sa kalsada at dumaraming sasakyan na kolorum.
Idagdag pa rito ang illegal parking, bus, jeep o tricycle na gumagawa ng sariling terminal, ang mga pabayang motorsiklong humaharurot sa kalsada at maging ang mga motorsiklong nahahagip ng ibang mga sasakyan kaya bumabagal ang daloy ng trapiko.
Isama pa natin ang lumulobong bilang ng mga bagong rehistradong sasakyan, taun-taon. Dahil dito, nakalulungkot na P3.5 bilyon na kinikita kada araw ang nawawala dahil sa suliraning ito.
Isa tayo sa mga nagtutulak ng panukalang-batas upang mawakasan na ang nakaaalarmang pagsubok na ito sa lahat ng mga Pilipino, isa na rito ang Senate Bill No. 994 o National Traffic Enforcement and Management Act.
Sa pamamagitan nito, matutulungan ang mga traffic enforcer upang magkaroon ng pormal na pagsasanay at kaalaman sa kanilang pangangasiwa at pamamahala, lalo na tungkol sa kaligtasan ng mga motorista, aksidente, imbestigasyon, driver’s training, post-accident management at pang-unawa sa mga paglabag at parusa.
Bubuuin ang National Traffic Enforcement and Management Center (NTEMC) bilang training center na responsable sa pagtuturo sa publiko sa wastong pagsunod sa trapiko at mga batas-trapiko.
Daraan sila sa mga pagsasanay upang matukoy ang mga sanhi at bunga ng aksidente sa daan.
Umaasa tayong maisasama rin sa pagtuturo ang road safety education sa mga paaralan bilang paghahanda ng mga estudyante, lalo na ang mga nasa legal age at marunong nang magmaneho.
Ito ay para sa kanilang kaalaman tulad ng mga dapat sundin na tuntunin, tungkulin at nakaabang na parusa o penalty na may kaugnayan sa trapiko at pagmamaneho.
Mahalagang habang maaga pa ay maibahagi na ang wastong disiplina at pag-iingat sa daan upang madala nila ito hanggang sa kanilang paglaki at ang mas mainam pa, maibabahagi rin nila ito sa susunod pang henerasyon.
Tulad ng palaging naririnig sa ating mga magulang at nakatatanda, dapat magsimula sa ating mga sarili ang tamang disiplina.
Kung sa ibang bansa, kailangang sumunod sa kanilang patakaran dahil sa takot na maparusahan, mas lalo namang dapat tayong sumunod sa mga alituntunin sa ating sariling bansa.
Dahil dito, malaki ang kahalagahan ng edukasyon sa pagtuturo ng disiplina dahil ito ang tulay tungo sa maayos at mapayapang pamumuhay.
Kung mapagtitibay natin ang disiplina sa bawat kabataan, tiyak ang malaking pagbabago sa susunod na henerasyon at siguradong makakamit ang kaayusan sa ating lipunan.
May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City o mag-email sa surewin.bulgar@gmail.com
Comments