Van nahulog sa sakahan, 15 nadale

Nasa 15 katao ang sugatan nang mahulog ang kanilang sinasakyang van sa sakahan sa Paoay, Ilocos Norte, Linggo ng umaga.

Dinala sa iba’t ibang pagamutan ng Mariano Marcos Memorial Hospital and Medical Center sa Batac City at Provincial District Hospital ang mga biktima na pawang sakay ng puting Nissan van na may plakang WVX 4922 na mula sa bayan ng Pagudpud.

Sa inisyal na imbestigasyon, habang pasilangan ang sasakyan ay nag-overtake umano ito sa sinusundang sasakyan.

Posibleng nawalan ng kontrol sa manibela ang driver ng van kaya dumiretso ito hanggang sa mahulog sa sakahan.

Napag-alaman sa report na galing sa bakasyon ang mga biktima at pauwi na ng Maynila nang mangyari ang insidente.