Malinaw ayon sa palad... BABAENG NAKATAKDANG MAKATULUYAN ANG LALAKING DATING KINAIINISAN
KATANUNGAN
Maestro, naniniwala ka ba sa “destiny”? May lalaki akong iniiwasan, pero nagtataka ako dahil palagi kaming pinagtatagpo.
Una, marami akong pinag-apply-ang universities dahil pabagu-bago ako ng isip kung saan ako mag-aaral, tapos hindi ko akalain na ru’n din sa school na ‘yun nag-aaral ‘yung lalaking iniiwasan ko at pareho pa kami ng course.
Dahil gusto ko siyang iwasan, imbes na morning session ay inilipat kong lahat ang mga subject ko sa afternoon session. Kaya lang nag-afternoon session din siya kasi may part-time job pala siya sa umaga.
Kaya kahit ayaw ko sa kanya, naging magka-classmate kami at minsan ay nagkakasabay pa kami sa jeep at bus. Para maiwasan ko siya, sa paradahan na lang ako ng FX sumasakay kahit hindi ko masyadong kabisado ru’n, pero laking-gulat ko isang araw pagsakay ko sa FX ay nandu’n siya sa hulihan at ‘yung kaisa-isang bakanteng upuang natira ay sa tabi pa niya. Lalabas sana ako at bababa, pero sabi ng caller na matagal pa raw darating ‘yung susunod na FX dahil traffic daw, kaya sumakay na rin ako dahil ayaw kong gabihin sa daan.
Dahil magkatabi kami sa upuan, nagkakuwentuhan kami nang matagal-tagal, pero feeling ko ang bilis ng oras at parang sandali lang ang naging kuwentuhan namin. Habang kakuwentuhan ko siya, ewan ko ba masaya ako at napansin kong ganundin siya. Parang matagal na kaming magkakilala at walang boring na sandali. Nang bumaba ako sa Bocaue at siya naman ay sa Balagtas, bitin at parang gusto ko pa ulit siyang makasakay at makausap.
Ano sa palagay ninyo, Maestro, pag-ibig na kaya itong nararamdaman ko sa kanya? Alam ninyo, tuwing makikita ko siya sa classroom, campus at kahit saan sa school, masayang-masaya ako at parang kumpleto ang araw ko kahit hindi na kami nagkukuwentuhan, sa halip ay nagbabatian na lang.
Sa gabi, kahit gusto ko ng matulog, hindi makaidlip ang aking diwa dahil pasok siya nang pasok kahit ayaw ko siyang papasukin sa aking isipan.
Kaya lang bakit ganu’n, parang ayaw kong aminin sa sarili ko na mahal ko siya? Since high school ay naiinis talaga ako sa kanya, pero ngayon hindi ko alam kung paanong nangyaring parang may special na akong pagtingin sa kanya.
Siya na kaya ang lalaking nakaguhit sa aking mga palad na magiging unang boyfriend ko at makakasama, habambuhay?
KASAGUTAN
Sabi ng hindi nagpakilalang awtor: “Sometimes, what you want isn’t always what you get, but in the end what you get is so much better than what you wanted”. Oo naman, minsan iyong hindi mo hinahanap ang dumarating at du’n ka higit na mas nagiging maligaya!
Tulad ng karanasan mo ngayon, Elsa, deny ka nang deny sa sarili mo na hindi mo gusto ang lalaking sinasabi mo, pero ang irony of life, pilit na pinagtatagpo ng tadhana ang inyong landas.
Ang totoo, kadalasan, ganyan talaga ang nangyayari sa kapalaran ng mga taong kuwatro kung saan sa umpisa, hindi nila gusto ‘yung lalaki, pero sa hindi sinasadyang pagkakataon, ‘yung hindi nila gusto ang napupunta sa kanila at sa bandang huli, ru’n nga sila nagiging maligaya.
Kabaligtaran naman nito, kapag ‘yung napunta sa taong kuwatro ay ‘yung taong gustung-gusto talaga niya, umasa kang du’n naman siya mabibigo at luluha.
Habang, ayon sa napakaganda mong Heart Line (Drawing A. at B. h-h arrow a.) sa kaliwa at kanan mong palad na kinumbinasyunan pa ng maayos at matino ring kaisa-isang Marriage Line (Drawing A. at B. 1-M arrow b.), walang alinlangan, sa unang pag-ibig na kunwari ay inaayawan mo pa, ito pala ang nakatakdang magbigay sa iyo ng matagumpay at maligayang pag-aasawa, habambuhay.
DAPAT GAWIN
Halos ganu’n nga ang manyayari sa iyong kapalaran sa larangan ng pag-ibig, Elsa, kung saan ayon sa iyong mga datos, tiyak ang maganap, ang kasalukuyang lalaking classmate mo na dati mong iniiwasan, pero ngayon ay palagi mong nakikita at nakakasabay, ang siya na ngang magiging first and last boyfriend mo at sa bandang huli, ang bubuuin ninyong relasyon ay mamumunga ng maligaya at panghabambuhay na pamilya.
Comments