Pulis binentahan | 2 BEBOT TIKLO SA MGA BALA AT SHABU

ARESTADO ang dalawang babae na hinihinalang sangkot sa iligal na droga at iligal na pagbebenta ng bala ng baril sa isinagawang buy-bust operation ng mga pulis sa Navotas City, kamakalawa ng hapon.

Kinilala ni Northern Police District (NPD) District Special Operation Unit (DSOU) P/Lieutenant Melito Pabon ang mga naarestong suspek na sina Evangeline Leongson, 41, at Julie Ann Paronia, 27, kapwa ng Bgy. Sipac Almacin.

Ani DSOU Investigator Pat. Josefino Estacio II, alas-4:00 ng hapon nang isagawa ng NPD-DSOU sa pangunguna ni PSMgt. Joel Rosales at Navotas Police sa pamumuno ni P/Col. Rolando Balasabas ang buy-bust operation of firearms ammunition kontra sa mga suspek sa bahay ni Leongson sa Gov. Pascual St.

Matapos iabot ng mga suspek ang 20 piraso ng bala ng cal. .45 sa isang undercover police na nagpanggap na buyer kapalit ng P400 marked money, agad lumapit ang back-up na mga operatiba at inaresto ang mga ito.

Nakumpiska rin sa mga suspek ang apat na sachets na naglalaman ng hindi pa matukoy na halaga ng hinihinalang shabu.