Pangangampanya ngayong Semana Santa, bawal!
ANG Semana Santa ay hindi panahon ng pangangampanya! Ito ang dapat tumatak sa isip ng mga kandidato, gayundin ng kanilang mga tagasuporta.
Gayunman, panawagan ng environmental group na EcoWaste Coalition sa mga kandidato na huwag samantalahin ang pagdagsa ng mga namamanata sa mga pilgrimage site ngayong Holy Week.
Ito ay dahil sa ilalim ng batas, ipinagbabawal ang pangangampanya sa kasagsagan ng Huwebes at Biyernes Santo kung saan bawal ang magsagawa ng motorcade, political advertisement sa radyo at telebisyon.
Samantala, posible kasing gumawa ng eksena ang mga tatakbo kahit walang pisikal na presensiya nila kung saan maaari silang magbigay ng libreng pamaypay, pagkain, tubig at marami pang iba na ikinokonsiderang “vote-buying”.
Dagdag pa rito, hindi tama kung maging ang panrelihiyosong gawain ay hahaluan pa nila ng politika, bilang respeto sa ating pananampalataya, kaunting hiya lang ang nais nating ipaalala sa mga tatakbo na kung saan-saan nagkakalat ng kanilang pagmumukha at pangalan.
Sa totoo lang, maraming panahon para riyan, kaya iwasan muna ang pagiging “epalitiko” ngayong ginugunita natin ang pagsasakripisyo ni HesuKristo para sa ating lahat.
Gayundin, panatilihing malinis ang kapaligiran at huwag nang magtapon kung saan-saan.
Ang mga polisiya ay dapat sundin para sa mapayapang Semana Santa at halalan!
Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com.
Comments