FARAON, DE LUNA AT 4 PA SA WORLD POOL

UMAKYAT sa anim ang mga manunumbok ng Pilipinas na sasargo sa final 64 matapos na makapag­poste ng malinis na kartada sina Raymond Faraon at Jeff de Luna sa final qualifiers ng 2019 World Pool Billiard Association (WPA) Players’ Championship sa Las Ve­gas, Nevada.

Sinagasaan ni Faraon sina Hsu Jui An (5-1), Blake Baker (5-1) at Luu Minh Phuc (5-1) pagkatapos ng opening round bye para makahak­bang sa susunod na bahagi ng labanang magkakaloob ng $10,000 sa makakaakyat sa trono at $7,000 sa magi­ging segunda.

Kinasangkapan naman ni de Luna ang mga panalo laban kina Ruslan Chinak­hov (5-3), Manuel Perez (5-2) at Chris McDaniel (5-3) at isang ring bye para mag­karoon ng tsansang tangha­ling inaugural champion ng malupit na paligsahang nila­lahukan ng mga de-kalib­reng manunumbok mula sa iba’t-ibang parte ng daigdig tulad nina Alexander Kaza­kis (Greece), Niels Feijen (Ne­therlands), Chang Jung-lin (Taiwan), Ko Pin-yi (Tai­wan), Shane Van Boening (USA), Fedor Gorst (Russia), Jayson Shaw (Scotland), Chris Melling (England), Dennis Grabe (Estonia), Thorsten Hohmann (Ger­many), Naoyuki Oi (Japan), Eklent Kaci (Albania), Mika “Iceman” Immonen (Fin­land) at Ralf “Kaiser” Sou­quet (Germany).

Nauna rito, nakakuha ng upuan sa main draw sina Carlo “The Black Tiger” Biado, Johann Chua, Zoren James “Dodong Diamond” Aranas at Jeffrey Ignacio sa pamamagitan ng iba’t-ibang landas. Sina Biado at Chua ay swak sa susunod na yugto ng kompetisyon dahil sa pagiging bahagi nila sa WPA top 20 rankings.

Si Aranas naman ay hu­mablot ng upuan sa pama­magitan ng bakbakan sa Qualifier No.1 habang si Ig­nacio ay nakasingit sa tulong ng makinang na paglalak­bay sa Qualifier No. 3.