ARANAS, KAMPEON ULI SA VIRGINIA BEHRMAN TOURNEY

NAIREHISTRO ni Zoren James “Dodong Dia­mond” Aranas ng Pilipinas ang kanyang pangalawang sunod na titulo at panglimang podium performance nga­yong taong kasalukuyan nang maipagtanggol niya ang tro­no ng Annual Barry Behr­man Memorial 9-Ball Tour­nament sa Virginia.

Tinabig ng Pinoy sa kan­yang daanan papunta sa kam­peonato sina Liz Taylor (9-3), Brandon Shuff (9-6), Chris Futrell (9-3), R.J. Carmona (9-2), JT Ringgold sa hotseat match (9-3) at Rey­mart Lim sa championship face-off (11-8).

Bago ang torneo, hinirang na hari si Aranas ng 2019 Super Billiards Expo (SBE) Diamond Open 10-Ball Pro Players’ Championships sa pa­laruan ng Pro Arena ng Oaks, Pennsylvania; naging bridesmaid din siya sa Derby City Challenge (DCC) 9-Ball event (Pebrero sa Elizabeth, Indiana), pangatlo sa Mary­land 9-Ball Bar Table Cham­pionships (Marso) at tersera naman uli sa Predator Grand Finale (Enero sa Astoria, New York).

Ang tagumpay sa Vir­ginia ang naging daan upang lalong tumibay ang kapit ni Aranas sa pampitong pu­westo sa 2019 AZBilliards moneyboard.