NM’S DELA CRUZ AT EMPERADO LIDER NA SA MCC FIDE RATED
MAGKASALO sa liderato ang mga National Masters na sina Noel Dela Cruz at Emmanuel Emperado dala ang kartadang 4.5 puntos ngayong pumasok na sa homestretch ang 2019 Metropolitan Chess Club (MCC) FIDE - Rated Standard Tournament sa Mandaluyong.
Kasama sa mga hinugutan ng buong puntos ni Dela Cruz, 3rd seed sa paligsahan, si NM Efren Bagamaspad (round 4), si 6th ranked Jose Carlo Castro (round 5) at ang mga junior chessers na sina Cyrus Vladimir Francisco (round 1) at Carl Martin Arandillo (round 2). Nakasikwat siya ng kalahating puntos sa teener na si Jericho Santiaguel noong pangatlong yugto ng paligsahang inoorganisa ng MCC ni dating national women’s team mainstay Mila Emperado.
Sina Marcus Timothy Imperial (round 1), James Riehyl Baligat (round 2), Lorenzo Cochanco (round 3) at Cedric Daniel Macato (round 5) naman ang nakatikim ng bangis ng 4th seeded na si Emperado habang nauwi sa draw ang sagupaan ng huli laban kay FIDE Master Nelson Mariano III noong round 4.
Nasa grupo naman ng mga 4.0 pointers at nakabuntot sa lead pack si International Master Barlo Nadera, second seed Mariano, Alwyn Sopungco at si Francisco.
Samantala, dalawang Pinoy woodpushers ang kabilang sa may malinis pang rekord sa ginaganap na Eastern Asia Chess Championships FIDE Zone 3.3 Open sa Ulaan Baatar, Mongolia. Dalawang magkasunod na tagumpay mula sa dalawang salang sa boards ang ipinoste nina Grandmaster John Paul Gomez (no.8, rating: 2460) at ang 20-taong-gulang na si IM Paulo Bersamina (no. 11, rating: 2444) para makasama sila sa tumatrangkong grupo.
Kasama nila ang mga Mongolian woodpushers na sina FM Urtnasan Nasanjargal at Galmandakh Bardakh. Siyam na kalahok ang nakabuntot sa kanila sa taglay na 1.5 puntos.
Comments