GM NORM CAMPAIGN NI MICIANO TULOY SA MONGOLIA FIDE MEET

SISIMULAN ni John Marvin Miciano ng Go For Gold Philippines ang kanyang kampanya para sa grandmaster norm ngayong Martes sa Eastern Asia Chess Championship sa Ulaanbaatar, Mongolia.

Puno ng sigla ang 18-anyos na Asian Youth chess cham­pion pagtuntong sa Fide-rated tournament na mag­tatapos sa Abril 16 at dito siya magkakaroon ng tsansa na makahakbang tungo sa GM norm.

Suportado si Miciano, ang pinakabatang International Master, ng Go For Gold sa layunin niyang makasungkit ng tatlong GM norms at sundan ang yapak ni chess whiz Wesley So.

“I need to compete in more international tournaments with highly-rated players and I’m hoping to get my first GM norm here in Mongolia,’’ ayon kay Miciano.

Unang nagmintis ang chess prodigy ng Davao City sa GM norm dahil sa 0.5 points nang malagay sa 12th place na may 242 participants sa 22nd Hogeschool Zeeland Tour­nament sa Vlissingen, Netherlands noong Agosto 2018. “When I saw his credentials, I knew he has great potential to become a GM,’’ ayon kay Go For Gold godfather Jeremy Go. “He deserves our support.’’

Tumapos din si Miciano na 11th overall sa may 105 chessers sa Open International De Sitges sa Spain kung saan mayorya sa entries ay mga GMs at IMs.

Sa ongoing Mongolia meet, maglalaro ang Philippine junior chess champion sa 9 rounds sa Fide Zone 3.3 tourney kontra Asia’s top players, kabilang na ang GM ng Vietnam at Indonesia.

Bukod kay Miciano, may stable of champions din ang Go-for-Gold tulad nina skateboarder Margielyn Didal, ang Philippine dragonboat team ng Philippine Canoe-Kayak Dragonboat Federation, cycling hero Rex Luis Krog at reig­ning Southeast Asian Games men’s triathlon champion Nikko Huelgas. Suportado rin ang national athletes sa wrestling, sepak takraw, Philippine Air Force volleyball squad at ang San Juan Knights sa Maharlika Pilipinas Basketball League. (MC)