Matapos palagan, P-Duterte biglang-kambiyo | ‘DOBLE PLAKA’ SA MOTOR, STOP!

PLANONG suspen­dihin ni Pangulong Rodrigo Duterte ang batas na mas ma­laking plaka sa harap at likod ng mo­torsiklo kasunod ng pagtutol dito ng libu-libong motorcycle riders.

Una nang nilagdaan ng pangulo noong nakalipas na buwan ang Motorcycle Crime Prevention Act na iniakda ni Senador Richard Gordon, na layuning ma­bawasan ang krimen sa sandaling maipa­tupad ang mas malalaking plaka.

Matatandaang, nagpro­testa ang libu-libong mo­tor­cycle riders kontra sa natu­rang batas dahil maaaring makadisgrasya lamang ang mas malaking plaka kung ilalagay din sa harapan ng mo­torsiklo dahil sa aerody­namics ng motorsiklo kapag mas matulin ang pagpapa­takbo nito.

Ayon kay Pangulong Du­­terte, tatalakayin niya ito kay Gordon at sa Land Trans­portation Office (LTO).

“Lakihan na lang ninyo ang plate number sa likod by one-fourth para makita talaga ‘yung number. Ang importante talaga ‘yung sa likod,” sabi ng pangulo.

“‘Yung sa harap… big­yan mo ng… kung may barilan d’yan, hindi mo na matingnan ‘yan. Pero kung papa — paalis na, mating… That’s the reason why it’s only at the back — placed at the back of…,” pahayag ng Chief Executive.

Ayon kay Pangulong Du­terte, pinirmahan niya ang nasabing batas dahil sa re­komendasyon na rin ng pulis at militar.

Kaugnay nito, balak ni Duterte na babaan ang multa sa hindi susunod sa batas na maaaring P10,000 hanggang P15,000 lamang.

“Ayan narinig na niya, so kausapin ko si Gordon. Maybe… at saka mahal masyado sir, ‘yung ano — ‘yung fine 50,000. Masya­dong mataas,” sabi ni Pa­ngulong Duterte.