4 miyembro ng Parojinog Drug Group, utas
APAT na lalaki na umano’y mga miyembro ng Parojinog Illegal Drug Syndicate ang napatay ng pulisya sa nangyaring magkahiwalay na police operations sa Mandaue City, Cebu, Biyernes ng gabi.
Unang napatay ang isang Jessie Parojinog alyas Oyong na nabaril ng mga pulis sa Bgy. Tingub makaraang magpaputok ng baril habang isinisilbi ang warrant of arrest laban sa kanya.
Dinala pa sa pinakamalapit na ospital si Parojinog pero, hindi na rin ito umabot ng buhay. Nakatakas naman ang isa pang kasama nito.
Napatay naman sina Henry Labajo at Eduard Baliling sa ikinasang police operation sa Bgy. Looc.
Isinisilbi sa dalawa ang warrant of arrest nang manlaban umano ang mga ito dahilan para gantihan ng mga pulis.
Samantala, pinagbabaril ng hindi pa matukoy na salarin na sakay ng motorsiklo ang isang Danilo Parojinog.
Ayon kay Police Major Mercy Villaro, ang mga napatay ay miyembro ng isang grupo na bahagi ng Parojinog Illegal Drug Group na nag-o-operate sa Ozamis City.
Nagsasagawa na ng follow-up operation ang mga pulis para sa iba pang miyembro ng nasabing grupo.
Comments