PAGULAYAN AT ARANAS, UMANGAT ANG RANKINGS

UMAKYAT sina Alex “The Lion” Pagulayan at Zo­ren James “Dodong Dia­mond” Aranas sa ranking ng 2019 AzBilliards Money­board matapos ang pagpapa­tuloy ng kani-kanyang im­presibong paglalakbay sa unang mga buwan ng kasa­lukuyang taon.

Nasa pang-apat na po­sisyon na si Pagulayan, hi­nirang na 2004 World 9-Ball Championship king, sa tala­an dahil sa naibulsa na niyang $28,500 samantalang naka­salampak sa pampitong bay­tang si Aranas sa tulong ng nakolekta nitong $23,225.

Limang beses nang naka­sampa sa podium ngayong 2019 ang 40-anyos na bilya­rista na ipinanganak sa Isa­bela. Kasama rito ang malu­pit na paghablot niya ng ko­rona sa apat na magkaka­ibang torneo: Music City Challenge (Enero; Madison, Tennessee), Scotty Town­send Memorial One Pocket at 9-Ball (Marso; West Mon­­roe, Los Angeles) at Texas 10-Ball Champion­ship (Peb­rero; Round Rock, Texas). Pumangatlo rin siya sa Der­by City Classic (DCC) One Pocket (Peb­rero; Elizabeth, Indiana). Ang pinakahuli ni­yang sinalihang bakbakan ay ang katatapos na World Pool Masters sa Gibraltar kung saan siya naging quarterfi­nalist.

Hinirang na kampeon si Aranas ilang araw pa lang ang nakakaraan sa Super Billiards Expo (SBE) Dia­mond Open 10-Ball Pro Players’ Championships (Marso; Pennsylvania), brides­maid sa DCC 9-Ball (Peb­rero; Elizabeth, Indiana) at tersera sa Predator Grand Finale (Enero, Astoria, New York) at sa Maryland 9-Ball State Bar Table Cham­pion­ship (Marso, Glen Burnie, Maryland).

Dalawang Pinoy pa ang napabilang sa piling listahan ng mga manunumbok: ang alamat mula sa Tarlac na si Francisco “Django” Busta­mante (13th, $17,700) at mo­neygame king Dennis “Ro­bocop” Orcullo (15th, $16,650).