Mga kabataan, bantayan ngayong bakasyon kontra droga!

BAKASYON mode na ang mga estudyante.

Kasabay nito, nagbigay-babala ang Philippine National Police (PNP) sa publiko na iwasang gumamit ng anumang uri ng party drugs.

Sa paglulunsad ng “Ligtas SUMVAC 2019” program, nais tiyakin ng mga awtoridad na maipatupad ang summer vacation security plan na layong mabantayan ang mga kilalang tourist destination kasabay ng kanilang anti-criminality operations ngayong tag-init.

Isa sa mga tututukan ang posibleng paggamit at pagbebenta ng party drugs sa mga beach resort.

Kaya utang na loob, huwag nang tangkain pang ipuslit ang mga kontrabando sa beach resorts.

Lalo na ang mga kabataan na pinagsasamantalahan ng mga tulak.

Ayon sa PNP, nasa 77,536 pulis ang ipakakalat sa buong bansa para sa naturang programa.

Magtatalaga rin ng mga pulis sa Boracay Island, Mactan sa Cebu, Bohol, Palawan at Siargao.

Gawin nating masaya ang bakasyon nang hindi napapahamak.

Bantayan natin ang isa’t isa at huwag hayaang mabiktima ng iligal na droga.

Payo rin sa mga magulang, antabayanan ang ating mga anak. Alamin kung saan at sino ang mga kasama nito ngayong bakasyon.