Kaso ng HIV, lumala

IKINABABAHALA na ng ilang kongresista ang dumaraming kaso ng Human Immunodeficiency Virus (HIV) na ka­hit mga menor-de-edad ay nagiging biktima.

Tinukoy ng mga mam­­babatas ang pina­kahuling tala na nasa mahigit 1,200 ba­gong kaso ng HIV noong Enero.

Sa nasabing bilang ng mga biktima, 53 ang kabataan kasama ang mga menor-de-edad na nasa 15 hanggang 17 taon.

Karamihan umano sa mga kabataang nagka­roon ng HIV ay dahil sa tinatawag na male-to-male contact o ang pagta­talik ng parehong lalaki.

Kaugnay nito, itinu­tulak sa Kamara na kumilos ang Department of Education (DepEd) at Commission on Higher Education (CHED) upang bumuo at magpatupad ng mga pro­grama na magpapaunawa sa mga millennial tungkol sa panganib ng walang pag-iingat na sexual behavior at ang banta ng HIV at AIDS.

Umapela rin ang mga kongresista sa Simba­han, civil society organizations at mga magulang na gawin ang kanilang papel para maituro sa kabataan ang pagiging respon­sable at kung paano maiiwasan ang HIV-AIDS.