Ex-GF na kainuman, ginulpi UTOL, 1 PA TODAS KAY KUYA

DEDBOL ang dalawa katao kabilang ang 28-anyos na lalaki matapos silang pagbabarilin ng kapatid ng biktima sa Sta. Cruz, Davao del Sur, kahapon.

Kinilala ang mga biktima na sina Elmon Galugas, 31, security guard at Mitchie Ababon Panerio, 28, mag­sasaka at kapatid ng suspek na bumaril sa kanila na si Jaime Ababon Panerio, 38, residente ng Bgy. Tinong­tongan, Bansalan.

Batay sa report kay Sta. Cruz Police Station Com­man­der Captain Mary Grace Martinez, nangyari ang pamamaril ng suspek sa bahay ng batang kapatid nito sa Sitio Lower Pogpog, Bgy. Sibulan, pasado alas-2:00 ng madaling-araw.

Nag-iinuman umano ang mga biktima nang dumating sa bahay ng batang Panerio ang suspek na lango sa alak at may bitbit na baril. Agad nilapitan ng sus­pek ang dating kasinta­han nito na nakilalang si Judecel Avergonsado na kasama sa nag-iinuman at pinagsisipa at pinagsusuntok ito.

Matapos ang pananakit kay Avergonsado, roon na pinagbabaril ni Jaime gamit ang .357 magnum na baril ang kapatid nito maging si Galugas. Naisugod pa sa ospital ang dalawa subalit, nasawi rin ang mga ito.

Sumuko naman ang sus­pek sa pulisya makaraan ang ginawang pamamaril. Sa interogasyon ng mga imbestigador, nagawa uma­no ni Jaime ang krimen dahil sa matinding pagseselos kay Galugas na nanliligaw sa dati nitong karelas­yon na si Aver­gonsado.