Eksklusib na polling precinct sa mga senior at PWD, ipatupad

NANAWAGAN si Se­na­tor Sonny Angara sa Commission on Elections na ipatupad ang batas na nag­lalayong bigyan ng sariling polling precincts ang mga nakatatanda at ang mga may kapansanan upang hindi ma­hirapang makisabay sa iba pang mga botante tuwing halalan.

Bagama’t, umiiral umano ang Republic Act 10366 na pinagtibay noon pang 2013, at ang regular na pagpapaalala ng Comelec sa mga polling precinct na maging paborable sa kalagayan ng mga naka­tatanda at PWD, nakata­tang­gap pa rin ng reklamo mula sa publiko ukol dito.

Isa umano sa mga ma­dalas ireklamo ang pag-akyat sa matataas na hagdan para makarating sa kanilang pol­ling precincts.

Samantala, pinaboran naman ng Comelec si Ruth Mariano Hernandez laban sa mga nagpetisyon sa kanyang kandidatura bilang kongre­sista sa ikalawang distrito ng Laguna.

Ibinasura ng Comelec 1st Division ang magkahiwalay na petisyon nina Victor Resma Publico at Erlinda Garcia Macua.

Sa desisyong inilabas noong Marso 29, pinaboran ng Comelec si Hernandez sa pagsasabing wala siyang nilabag sa pagsusumite ng COC at kuwa­lipikado siyang kumandidato.

Nilagdaan ang nasabing desisyon nina Commis­sioners Al Parreno bilang presiding officer kasama sina Rowena Guanzon at Marlon Cos­quejo. (BRT)