Sa harap ng asawa‘t mga anak | KONSEHAL NIRATRAT, UTAS

PINAGBABARIL hanggang sa mapatay ng hindi pa mabatid na bilang na mga salarin ang kasalukuyang konsehal sa bayan ng Moises Padilla, sa Negros Occidental, kahapon.

Limang tama ng bala ng baril sa ulo at katawan ang agad tumapos sa buhay ng biktima na nakilalang si Jolomar Hilario habang ligtas naman ang kanyang asawa at mga anak sa pangyayari.

Batay sa inisyal na imbestigasyon, pinasok ng ilang armadong lalaki na pawang may mga suot na bonnet at baseball cap ang bahay ng konsehal sa Barangay Inolingan habang ito ay naghahanda ng kanyang agahan bago siya pinagbabaril ganap na alas-6:00 ng umaga.

Nabatid na bago isinagawa ang pamamaslang ay naglagay ng ilang landmine o Improvised Explosive Device (IED) ang mga suspek sa daraanan patungo sa bahay ng opisyal upang mapigilan ang pagresponde ng mga awtoridad sa lugar ng krimen.

Nagpakilalang mga miyembro umano ng NPA ang nanguna sa ginawang paglikida kay Hilario base sa nakuhang impormasyon mula sa mismong asawa ng biktima at ng ilang katabing residente.

Patuloy ang follow-up operation ng pulisya laban sa mga suspek at inaalam pa kung ano ang motibo sa pagpaslang sa opisyal.