Inutil sa war on drugs | 51 MAYORS KINASUHAN

KINASUHAN ng Department of Interior and Local Government (DILG) sa Office of the Ombudsman ang 51 alkalde dahil sa mahinang pagtatrabaho o sadyang walang binuong anti-drug abuse councils (ADAC).

Ayon kay Assistant Secretary Ricojudge Echiverri, mga reklamong administratibo tulad ng misconduct at dereliction of duty ang inihain laban sa mga alkalde.

Binanggit pa nito na siyam sa mga kinasuhan ay sangkot din umano sa illegal drug trade habang hindi nagtatrabaho ang kanilang binuong ADAC.

Sa complaint-affidavit, binigyang-diin ni Echiverri na ilang beses nang napaalalahanan ang naturang mga local government official na isaaktibo, palakasin at tiyaking kumikilos ang anti-drug councils sa kanilang munisipalidad.

Nauna nang lumagda ang DILG at Dangerous Drugs Board ng joint

memorandum para itulak sa LGUs ang pagbuo ng ADAC.

Gayunman, hindi sumunod ang mga kinasuhang alkalde kaya dapat umanong maharap sa pagdidisiplina, suspensyon o pagkakasibak sa tungkulin ang mga ito.

“We will leave it to the Ombudsman to decide kung pinakamababa is reprimand, one is suspension, or pinaka-worse is removal. Seryosohin nila ‘yung pag-organize ng ADAC, which is provided by law,” dagdag pa ni Echiverri.