Matapos makipag-inuman | MISIS KINATAY

ISANG ginang ang natagpuang patay sa kanyang silid, kamakalawa ng umaga sa Bgy. Tamba, Bayambang, Pangasinan.

Nakilala ang biktimang si Grace Borja, 39, may asawa at naninirahan sa nabanggit na lugar.

Batay sa imbestigasyon, alas-11:00 ng umaga nang madiskubre ng pinsan ng biktima na si ‘Karen’ ang labi ni Borja sa kanyang silid.

Tadtad ng saksak ang katawan ng ginang na sanhi ng agaran nitong kamatayan.

Nabatid na nakipag-inuman ang ginang sa kanyang mga kaibigan at nang malasing ito, inihatid sa kanyang silid ng inuupahan nilang bahay saka iniwan.

Gayunman, nang gigisingin ni ‘Karen’ ang biktima, laking-gulat nito nang madatnan na wala nang buhay at naliligo sa dugo si Borja.

Patuloy pang inaalam ng pulisya ang motibo sa krimen.