MARINERO, NAKAIPON ULI NG LAKAS; UST VS. ADAMSON SA SOFTBALL FINALS

KUMAMADA ng dou­­ble-double 29 puntos at 10 rebounds si Santi Santillan upang tulungang makabalik ang Marinerong Pilipino sa win column sa pamamagitan ng 91-72 demolisyon ng re­branded CD14 Designs-Trinity University of Asia kahapon sa 2019 PBA D-League sa JCSGO Gym sa Cubao.

Nag-take-charge ang La Salle forward sa 3rd period kung saan kanyang isina­lansan ang 13 sa naging ka­buuang output upang ibigay ang komportableng 65-48 na kalamangan sa Skippers.

“Ang sinasabi ko na lang sa kanila palagi, kailangan naming ibigay ang best effort sa practice. Doon kami mabubuo as a team lalo na at akyat-baba ang laro ng players namin. Buti naman ngayon, lumabas ang resulta,” wika ni coach Yong Garcia.

Dahil dito ay tumaas ang Marinerong Pilipino sa 3-2, panalo-talong marka sa Foundation Group, habang nanatiling walang panalo ang CD14 Designs-Trinity mata­pos ang apat na laro. Nagtapos na topscorer si AJ Vitug sa itinalang 18 puntos para sa CD14 Designs-Trinity, na dating kilala bilang The Masterpiece Clothing-Trinity.

Samantala, muling itinakda ng UST ang pagtutuos nila ng Adamson University sa finals makaraang kumple­tuhin ang pagwalis sa second seed De La Salle, matapos ang kanilang 9-2, panalo sa kanilang knockout game sa UAAP Season 81 softball tournament sa Rizal Memorial Baseball Stadium kahapon. (VA)