ELORTA, PINAHIRAPAN MUNA BAGO NAKORONAHAN SA RAPID CHESS

TUMIKLOP si National Master David Elorta sa huling yugto pero hindi ito naging hadlang para makoronahan siyang hari ng 7th Jong Guevarra Cup Open Rapid Chess Tournament sa Toril Gym ng Davao City.

Nagtagumpay si Edsel Montoya na mantsahan ang rekord ng 36-taong-gulang na si Elorta sa round 8 pero dahil nauna nang bumulusok sa pagrerehistro ng pitong sunod-sunod na panalo ang topseed ay hindi na napigilan ang pag-akyat sa trono ng huli.

Kasama sa mga hinugutan ng buong puntos ni Elorta, may rating na 2461, sina Grandmaster Darwin Laylo (round 5) at FIDE Master Austin Jacob Literatus (round 6).

Nakatikim din ng pagkatalo sa kamay ng kampeon na nagrehistro ng 2492 na performance rating, sina Perkins Bayron (round 1), Irwin Aton (round 2), Jayson Salubre (round 3), Johnel Balquin (round 4) at Rogelio Canoy (round 7).

Naisalba ni Montoya ang pangalawang puwesto matapos itong makapagposte ng 6.5 puntos at mas mataas na tiebreak points kontra kina Literatus at Balquin. Sina Montoya, Literatus at Balquin ay tumapos na may bitbit na 6.5 puntos.

Pumasok sa top 5 sina Literatus (3rd), Balquin (4th) at Laylo (5th) sa torneong umakit ng 64 disipulo ng paspasang ahedres kabilang na ang isang GM, isang WIM, tatlong FM, dalawang ACM at apat na NMs.