3 tulak, utas sa parak

DEAD-ON-THE SPOT ang tatlong hinihinalang tulak ng shabu maka­raang makipagbarilan sa mga pulis sa ikinasang buy-bust operation sa City of San Jose del Monte, Bulacan, ma­daling-araw ng Lunes.

Kinilala ang mga suspek na sina Geoffrey Villarey, residente ng Bgy. Minuyan Uno, nasa drug watchlist ng PDEA; Arvin Lope at isang hindi pa naki­kilala.

Ayon kay City of San Jose del Monte Police Office Director Supt. Orlando Castil, Jr., ala-1:40 ng madaling-araw nang magkasa ng operasyon ang CSJDM Police Station Drug Enforcement Unit sa Towerville, Bgy. Minu­yan Proper.

Matapos magka­abutan, nakatunog umano ang mga suspek na pulis ang kanilang katransaksiyon at agad bumunot ng baril saka pinaputukan ang dala­wang undercover police.

Bumuwelta naman ang mga pulis sa mga suspek na naging dahilan ng kanilang kamatayan.

Nakuha sa lugar ng engkuwentro ang tat­long .38 baril at dala­wang motorsiklong gamit umano sa kani­lang pagtutulak ng iligal na droga.