Sa katapusan ng Abril | ANGAT DAM, PAPALO SA CRITICAL LEVEL

POSIBLENG pumalo sa kritikal na antas ang tubig sa Angat Dam sa katapusan ng Abril.

Ayon kay PAGASA Hy­drologist Danny Flores, kung pagbabatayan ang araw-araw na pagbaba ng water level sa Angat Dam at walang dumarating na pag-ulan, patuloy na mababawasan ang tubig.

“Kinukuwenta natin, aabutin siya ng mga halos katapusan pa ng Abril. Ba­baba siya roon sa kanyang critical level,” ani Flores.

Mula nang ideklara ang panahon ng tag-init, patuloy na bumubulusok ang water level ng Angat Dam.

Kahapon, umaabot na sa 195.91 meters ang antas ng tubig sa dam na mas maba­ba sa normal high water level na 212 meters.

Siyamnapu’t anim na porsiyento ng tubig sa Metro Manila ang isinusuplay ng Angat Dam.

Maliban sa pagpasok ng tag-init, kasalukuyan ding na­raranasan ang El Niño phe­nomenon na lalong mag­papatindi ng mainit na pa­nahon sa maraming lugar sa bansa.