TOP 3 PLAYERS BAWAT REHIYON BABANAT SA BEST SUPER LEAGUE

MULING aagaw ng pansin ang mga manlalaro ng table tennis sa Best of the Best Super League na gagawin sa Marso 27-31 sa Lipa City, Batangas.Ang top 3 players kada rehiyon ay kalahok sa 5-araw na torneo na sinuportahan ng Philippine Sports Commission at Philippine Olympic Committee sa pagtataguyod ng Table Tennis Federation of the Philippines ni Ting Ledesma.

Lahat ng rehiyon ay kasali maliban sa ARMM, CAR, at Region VII na hindi nagpadala ng kanilang mga atleta sa torneo na kasama sa selection process na kakatawan sa ‘Pinas sa 2019 30th Southeast Asian Games sa Nobyembre sa New Clark City Sports Complex.

“Players will emerge in the competition will have the chance to play in the SEA Games,” sabi ni Ledesma habang pinapanood ang mga manlalarong nagsasanay sa masusing gabay ni Korean coach Kim Me Sook.

Pinalawig ng PSC ang coaching contract ng Korean coach na taga-Seoul para hasain at pagalingin ang mga Pinoy bilang paghahanda sa SEA Games na pang-apat na beses sa ‘Pinas mula 1981 at huling nilaro sa Malaysia noong 2017.

“Play your best out there and do not underestimate your rivals to avoid embarrassment and humiliation,” wika ni Ledesma na dating national player na lumaro sa iba’t-ibang torneo. Kasama sa mga kalahok sina Ryan Rodney Jacolo, Jean Mari Nayre, Rose Jean Fadol, Japeth Adasa, Sendrina Andrea Balatbat, at Emy Rose Dael.

Kamakailan ay napanalunan ni 2-time SEA Games veteran Jacolo ang titulo sa men’s kontra fellow national player Jan Mari Nayre at nasungkit ni Rose Jean Fadol ang korona sa women sa TTFPI Table Tennis Cham­pionship na nilahukan ng mahigit 500 players na ginawa sa Ninoy Aquino Stadium.