Paggamit ng husto at tama sa budget sa sektor ng edukasyon, gawin!

KUYA WIN GATCHALIAN / WIN TAYONG LAHAT

TULAD ng sinabi ng dating pangulo ng South Africa na si Nelson Mandela, ang edu­kasyon ay ang pinakamakapangyarihang armas na magagamit upang baguhin ang mundo.

Dahil dito ay itinalaga ni Pangulong Rodrigo Duterte ang pinakamalaking parte ng budget para sa sektor ng edukasyon kaya naman dapat lamang na magamit ito nang tama at husto sa lahat ng posibleng pamamaraan sang-ayon sa pangunahing pangangailangan ng mga paara­lan, lalo na ng kabataan.

Ang Special Education Fund (SEF) ng Local Government Units (LGUs) ay kabilang sa mga pinagmumulan ng pondo para sa mga humi­hiling ng suportang pampinansiyal na natatang­gap ng LGUs mula sa mga paaralan sa ilalim ng kani-kanyang nasasakupang lugar.

Noong 2017, naglabas ang Department of Education (DepEd) ng Revised Guidelines on the Use of the Special Education Fund upang ma-update ang mga polisiya at alituntunin ng SEF na inilathala ng DepEd, Department of Bud­get and Management (DBM) at Department of Interior and Local Government (DILG).

Mahigit dalawang dekada na mula noong na­isabatas ang Republic Act (RA) No. 7160 o Local Government Code of 1991.

Kaya naman marami sa mga nakasaad na probisyon at nilalaman nito ay hindi na sapat para matugunan ang iba’t ibang pangangaila­ngan ng mamamayan sa kasalukuyang pa­nahon.

Sa ilalim ng RA No. 7160, lumalabas na limi­tado lamang ang sakop ng alokasyon ng SEF kaya nahihirapang makapagpatupad at mapon­dohan ang mga makabuluhang programa at aktibidad para sa pakinabang ng kabataang mag-aaral maging ng kanilang mga magulang.

Bilang vice-chairman ng Senate Committee on Education, Arts and Culture ay ipinanukala natin ang Senate Bill No. 207 o “An Act Ex­panding the Purpose and Application of the Special Education Fund (SEF), Amending for the Purpose Section 272 of Republic Act No. 7160, Otherwise Known as the ‘Local Government Code of 1991.’”

Nilalayon nitong dagdagan ng 1% SEF tax na minamandato ng RA No. 7160. Ipinatutupad sa nasabing panukala na mapalawak pa ang aplikasyon ng SEF sa iba pang aspeto na may kinalaman sa edukasyon na mapakikinabangan ng mga estudyante sa kanilang pag-aaral.

Aamyendahan ng ating panukalang-batas ang Section 1 at Section 272 ng RA No. 7160 kung saan ang kapupuntahan ng adisyunal na 1% tax ay operasyon at maintenance ng mga pam­publikong paaralan na paghahatian ng mga provincial at municipal school board.

Kabilang dito ang operasyon ng non-formal education programs at ang pambayad sa suweldo, allowance at iba pang benepisyo para sa mga teaching at non-teaching personnel.

Palalakasin din ang programa para sa early children education, special education, maging ang pagsasagawa ng teachers’ competency trainings.

Tutugunan din ng SEF ang mga panga­nga­ila­ngan para sa Early Childhood Education at Special Education.

Kasama rin sa susuporta­hang gastusin ay ang pagpapatayo at pagpapa­gawa ng school buildings, pasilidad, research studies, pag­bili ng aklat, peryodiko at sports development.

Tiyak na makatutulong ang SEF upang ma­ka­­mit ng kabataan ang de-kalidad na edukas­yon. Panahon na upang iakma ang mga batas sa pangangailangan ng guro, kurikulum at pasili­dad ng lahat ng paaralan.

Sa pakikipagtulungan sa ating kapwa mam­babatas, umaasa tayo sa tagumpay ng pagsa­sa­­­batas nito sa lalong madaling panahon.

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City o mag-email sa surewin.bulgar@gmail.com