Narco-politicians ibinulgar, hamon kay P-Duterte | ARTISTANG TULAK, ADIK NEXT!

MATAPOS pangalanan ni Pangulong Rodrigo Duterte ang mga tinaguriang narco-politician, nais ni Senate President Vicente Sotto III na isapubliko rin ang pangalan ng mga celebrity na sangkot sa iligal na droga.

“Might as well name the celebrities patronizing these drug pushers,” ani Sotto.

“At least, ‘yun ‘pag galing sa pusher ang info, validated,” dagdag pa nito.

Matatandaang, ibinulgar ng Philippine Drug Enforcement Agency (PDEA) na may dalawang celebrities, lalaki at babae ang umano’y katransaksiyon ng sinasabing bigtime supplier ng party drugs sa Metro Manila na napatay sa operasyon na si Steve John Pasion.

Ayon kay PDEA Special Enforcement Service director Levi Ortiz, batay umano sa palitan ng mensahe, kukuha ng 200 piraso ng ecstasies ang dalawang celebrity mula kay Pasion.

Sa panayam, sinabi ni PDEA Director General Aaron Aquino, na sikat ang mga katransaksiyon ni Pasion na araw-araw umanong nakikita sa telebisyon.

Gayunman, bago ito, dati nang sinasabi ng mga awtoridad na may mga celebrity na sangkot at gumagamit ng droga. (BRT)