Babala sa madalas sumasakit ang batok!

SHANE M. LUDOVICE, M.D / SABI NI DOC

Dear Doc. Shane,

Ako ay 38 years old at mahigit 10 taon na ako sa aking trabaho bilang administrative assistant sa retail company. Ilang araw ko nang nararam­daman ang pananakit ng aking batok. Hindi ko alam kung ito ay dahil sa sobrang pagod o maling posisyon sa paghiga. High blood ako, pero controlled naman ito dahil may maintenance naman ako. Puwede bang maging dahilan ng pagsakit ng batok ang high blood pressure? — Miranda

Sagot

Maraming tao ang nakararanas ng pananakit ng batok at leeg. Sa maraming pagkakataon dahil ito sa hindi tamang postura o sobrang paggamit ng mga kalamnan sa leeg. Kung minsan, ang pananakit ng batok ay dahil sa pinsala na dala ng aksidente at laro.

Madalas ay hindi naman ito lubhang seryoso at nawa­wala rin sa loob ng ilang araw. Sa ilang kaso, ang pananakit ng batok ay sintomas ng ser­yosong karamdaman. Kapag ang pananakit ng batok ay hindi nawawala sa loob nang mahigit isang linggo, malalang pananakit o may kasamang iba pang sintomas, kailangan agad magpatingin sa doktor.

Narito ang ilan sa mga dahilan ng pananakit ng batok:

• Tensiyon sa kalamnan ng leeg

• Atake sa puso

• Meningitis

• Sakit sa batok

Kinakailangan nang magpa-check-up kung naka­raranas ang mga sumusu­nod:

• Matinding pananakit ng batok o leeg

• May nakakapang bukol sa leeg

• Mataas na lagnat na higit sa isang linggo

• Masakit ang ulo

• Namamaga ang kulani

• Pagsusuka

• Nahihirapan sa paglunok ng pagkain o tubig

• Nahihirapan sa paghinga

• Nanghihina

• Namamanhid

• Pananakit ng batok na umaabot sa mga kamay at paa

• Hindi maikilos ang mga kamay o paa

• Hindi maigalaw ang baba papuntang dibdib

• Hindi makaihi o makadumi

Kung naaksidente o nahulog sa mataas na lugar at sumasakit ang leeg, makabubuti kung pumunta agad sa doktor para agad itong malunasan.