CIGNAL-ATENEO, NAKARESBAK, DAPA ANG ONLINE SA D-LEAGUE

BUMALIKWAS pa­balik ng winning track ang Cignal-Ateneo matapos pa­dapain ang AMA Online Education, 111-81, kahapon sa 2019 PBA D-League sa Ynares Sports Arena sa Pasig.

Nagposte si Ivorian center Angelo Kouame ng 22 puntos, 15 rebounds, at 4 na blocks upang giyahan ang panalo ng Blue Eagles at bumawi sa hindi niya pag­lalaro noong nakaraang laban habang nagdagdag si Thirdy Ravena ng 14 pun­tos, 8 assists, at 4 na re­bounds sa loob lang ng tat­long quarters. Nagdagdag si BJ An­drade ng 21 puntos , 14 pun­tos din mula kay William Navarro at double-double 10 puntos at 12 rebounds kay Mike Nieto para sa Ateneo.

Simula pa lang ay ru­mat­sada na ang Cignal-Ateneo, 9-0 na umabot ng 27-9 na kalamangan sa dulo ng first quarter. Hindi na sila muli pang lumingon mula roon upang ganap na makabawi buhat sa 98-112 na pagkatalo sa ka­may ng University of Santo Tomas.

“I just feel like we were a little bit dispres­tecful to ourselves, to our opponents, and to the game, but more to ourselves the last time out. We have to come out and do your best every game and today, we were much better,” wika ni Ate­neo coach Tab Baldwin.

Dahil dito, tumaas ang Blue Eagles sa 3-1 kartada sa Aspirants Group habang nalaglag sa kabaligtarang baraha ang Titans.

Nagtala ng game high- 41 puntos si Joshua Munzon ngunit hindi ito sapat upang ihatid ang AMA sa tagum­pay. Mga laro sa Lunes: Paco Arena, Manila: 2 p.m. - McDavid vs Petron-Letran: 4 p.m. - St. Clare College Virtual Reality vs Batangas-EAC. (VA)