2 PA HEBIGAT NA CUE ARTISTS, PIPILIIN PARA SA SEAG CHANCE

KUMPLETO na ang listahan ng mga manlalaro na nakapasok sa hom­estretch ng tryouts para sa tigalawang slots sa 9-Ball billiards ng koponan na ka­katawan sa Pilipinas sa 2019 South East Asian Games kung saan tatayong punong-abala ang bansa.

Nakahilera sina Carlo “Black Tiger” Biado, Fran­cisco “Django” Bustamante, Efren “Bata” Reyes, Warren “The Warrior” Kiamco, Dennis “Robocop” Orcullo, Judel Manzon, Jeffrey Ig­nacio at Johann Chua bilang bahagi ng walong manu­numbok na pulutong na may tsansa pa para masikwat ang dalawang upuan sa 9-ball team.

Salpukang Biado-Busta­mante, Reyes-Kiamco, Or­cullo-Manzon at Ignacio-Chua ang unang masasak­sihan ngayong Marso 18-19 na kaganapan. Ito ay lala­patan ng “race-to-11”, “alter­nate break” at “double eli­mination” na tuntunin.

Ang mangingibabaw sa winners’ bracket at magiging angat sa one-loss side ang mag­susuot ng Philippine tri-colors. Halos lahat ay mga bati­kan sa bakbakan sa interna­tional tourneys kaya walang nakakasiguro sa dalawang slots na bakante.

Sa kababaihan, aangas na sa mesa sina Chezka Cen­teno, Hannah Magluyan, Rizza Mae Dela Cruz, Iris Ranola, Floriza Andal, De­nise Santos, Geona Gregorio at Rubilen Amit. Banggaang Centeno-Magluyan, Dela Cruz-Ranola, Andal-Santos at Gregorio-Amit ang naka­latag sa huling bahagi ng women’s tryouts. Dahil mga dating SEAG gold me­dalist, sina Amit at Cen­teno ang paboritong maka­ka­ku­ha ng mga upuan.