Kakulangan sa supply ng tubig, talupan!

TUBIG! Kasabay ng mainit na panahon, mainit din ang ulo ng mga residenteng apektado sa kakulangan ng supply ng tubig.

Kaugnay nito, nais ng pamunuan ng Senado na maimbestigahan ang sitwasyon, partikular na sa Metro Manila.

Dapat malaman kung ano ang problema at kung sino ang dapat managot sa kakapusang ito.

Hindi tama na hanggang reklamo lang ang publiko at maghintay ng rasyon o kung kailan magkakatubig sa gripo.

Alamin din natin kung may pananagutan ang mga water regulator sa kanilang mga kostumer.

Kaya inatasan na ang concerned committee na magsagawa ng imbestigasyon.

Hindi na rin katatanggap-tanggap na isinisisi sa El Niño ang water shortage dahil taun-taon naman natin itong nararanasan kaya dapat napaghahandaan na.

At habang inaalam ang ugat ng problema at pinag-iisipan ang ma­tagalang solusyon, dapat lang na may aksiyon ang mga supplier ng tubig tulad ng binabanggit nilang ‘water sharing’.

Samantala, posible umanong umabot hanggang sa Hunyo ang kakapusan ng suplay ng tubig dahil sa mababang water level sa La Mesa Dam.

Kaya tiis-tiis pa more at piliting huwag maapektuhan ng sobrang init at kakulangan ng tubig ang ating pasensiya.