Mga pasaway na driver, huwag kunsintihin!
BAKIT kaya kung sino na ang mali, sila pa ang galit? Hmmm…
Madalas nababalitaan natin, lalo na kung ang usapin ay tungkol sa batas-trapiko, karamihan sa mga lumalabag, eh, sila pa ang nagngingitngit sa galit.
‘Yung tipong, may ipinaglalaban pa rin kahit na hindi naman na mailulusot ang kanilang mga punto.
Suking-suki riyan ang mga taxi driver na bukod sa nagpapasaway sa daan, eh, nanloloko pa ng kanilang mga pasahero.
Sa katunayan, isang taxi driver ang nag-counter flow umano sa kahabaan ng Quirino Highway, kamakailan kung saan huli sa video kung paano siya nagpasaway sa daan kasabay ng panlalait sa lalaking kanyang nakaengkuwentro.
Gayunman, ayon kay Land Transportation Franchising and Regulatory Board (LTFRB) Chairman Martin Delgra III na sisiguraduhin nilang mapapatawan ng kaukulang parusa ang nasabing pasaway na driver dahil malinaw na lumabag ito sa batas-trapiko.
Kaya ang panawagan natin sa mga taxi operator, higpitan ninyo ang pamimili sa inyong mga empleyado dahil kung lumabag sila sa batas-trapiko, tiyak na damay kayo dahil responsibilidad ninyo sila.
Dagdag pa rito, huwag tayong puro reklamo na ang trapik-trapik dahil sa totoo lang, isa rin tayo sa mga dahilan, lalo at karamihan sa atin ay kulang sa disiplina at masyadong naghahari-harian sa daan.
Hindi naman siguro mahirap sumunod sa mga simpleng patakaran na paniguradong makatutulong para sa lahat ng mamamayan!
Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com.
Comments