Ipina-bloter sa pagnanakaw | LALAKI NANG-AGAW NG BARIL SA PRESINTO, UTAS

DEDBOL ang isang lalaki na suspek sa kasong pagnanakaw matapos umanong mang-agaw ng baril ng pulis kahapon ng madaling-araw sa loob ng Sibama Police Community Precinct (PCP) na nasa panulukan ng Maceda at Simoun Sts., Sampaloc, Manila.

Kinilala ang nasawi na si Brando Badid, ng Pier 15, Port Area, Manila.

Batay sa ulat ni PS/Sgt. Joel Jazareno, alas-1:34 ng madaling-araw nang dalhin ng mga tanod ng Bgy. 492 si Badid dahil sa kasong pagnanakaw.

Nabatid na nasa loob na ng PCP at ibina-blotter ang pagdala kay Badid nang bigla nitong agawin ang baril ni Patrolman Rolando Foronda, Jr.

Habang nakikipag-agawan si Foronda, nagawa umano ng suspek na makalabit ang gatilyo ng dalawang beses pero, hindi tinamaan ang pulis.

Hanggang sa makalabit nitong muli at tinamaan na ang suspek sa kanang bahagi ng kanyang mukha.

Naisugod pa ang suspek sa Ospital ng Sampaloc pero, idineklarang dead-on-arrival.