Dahil sa kakulangan ng construction workers sa bansa, P900 minimum wage para sa kanila, isinusulong!
NANAWAGAN ang partylist group na ACTS-OFW na gawing P900 ang minimum wage ng mga construction worker sa bansa.
Kasunod ito ng kakulangan umano sa mga construction worker sa kasalukuyan dahil sa pagtatrabaho nila sa abroad.
Ayon kay ACTS-OFW Rep. Aniceto Bertiz II, ang mga employer mula sa ibang bansa ay nagbabayad ng sampung beses na mas malaki sa P537 minimum wage sa Metro Manila.
Kabilang sa mga bansang ito ang New Zealand kung saan nagbabayad umano sila ng P5, 300 kada araw para sa kanilang mga construction worker.
Gayunman, kung ganito ang magiging suweldo ng mga ito, naniniwala ang mga mambabatas na maiiwasan na ang paglayo nila sa kanilang mga pamilya na maaaring magkaroon ng masamang epekto para sa kanila
Samantala, kung maipatutupad man ang nasabing umento, paniguradong marami ang magrereklamo tulad ng mga nurse, teacher at iba pa.
Dagdag pa rito, kung ‘yung dagdag na P25 sa minimum wage ay natagalan pa bago maipatupad, posibleng ganito rin ang mangyayari sa kahilingang ito.
Pero, para sa mas asensado at magandang sahod sa mga manggagawa sa ating bansa, huwag tayong mawalan ng pag-asa dahil makaaahon din tayo sa kahirapan.
Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com.
Comments