Mag-utol 2 pa timbog sa droga

TATLONG hinihinalang sangkot sa iligal na droga kabilang ang magkapatid ang nasakote sa buy-bust operation sa Caloocan City, kamakalawa ng gabi.

Kinilala ni Caloocan Police Chief Sr. Supt. Restituto Arcangel ang mga naarestong suspek na sina Kevin Regis, 27, pusher; Jhon Jerryco Manliclic, 23, pusher at kapatid nitong si Jimbo Manliclic, 21, user, pawang mga residente ng Bgy. 171, Baumbong.

Ayon kay Caloocan Police Deputy Chief for Administration Supt. Ferdie del Rosario, alas-11:30 ng gabi nang ikasa ng mga operatiba ng SDEU at PCP-6 sa pangunguna ni PSI Harold Aaron Melgar ang buy-bust operation kontra sa mga suspek.

Nagawang makabili ng undercover police sa mga suspek ng isang sachet ng shabu na nagkakahalaga ng P200 at nang magkaabutan, lumusob na ang back-up na mga operatiba at sinunggaban ang tatlo.

Ani SDEU Head PCI Rengie Deimos, narekober sa mga suspek ang tatlong sachets ng shabu, pitong sachets ng hinihinalang pinatuyong dahon ng marijuana, buy-bust money at 500 peso bill.