Kapakanan ng mga mag-aaral na may special needs, bigyang-prayoridad!

KUYA WIN GATCHALIAN / WIN TAYONG LAHAT

TUNGKULIN ng pamahalaan na magka­loob ng pantay-pantay na edukasyon sa mga kabataang mag-aaral.

Ang edukasyon na libre, de-kalidad at inklu­sibo ay para sa lahat kung saan walang batang mapag-iiwanan at walang dapat makahadlang sa kanilang katayuan, kasarian, sosyal at ka­pansanan na pagkakaiba-iba.

Ayon sa Department of Education (DepEd), ang kasalukuyang bilang ng naka-enroll na mga batang may special needs sa public ele­mentary school ay 40,181.

Itinataya rin nito na humigit-kumulang 5.5 milyong Pilipino ang may special education needs. Nangangahulugan lamang ito na isa sa ba­wat walong kabataan ay walang sapat na ka­kayahang mag-aral at makipagsabayan sa regular na eskuwelahan.

Sila ay may taglay na pagkakaiba sa mga aspeto kabilang ang pisikal (bingi, bulag o orthopedic impairment), cognitive (tulad ng autism o intellectual handicaps), psychological (anxiety disorder, attention deficit, hyperacti­vity disorder) at komunikasyon (speech im­pairments o speech-based developmental disorder).

Dahil sa epekto ng kanilang special needs, may posibilidad na mawalan din sila ng opor­tunidad at kakayahan na matamo ang tamang edukasyon na magpapaangat ng kanilang ka­lagayan.

Ngunit, ang pagsubok ngayon sa mga re­gular na publiko at pribadong paaralan ay wa­lang sapat na kaalaman, kasanayan at kagami­tan para maipagkaloob ang pag-iingat, pag-aaruga at pagsubaybay ang pagpapaunlad ng pisikal, cognitive at social skills ng mga estud­yan­teng may special needs.

Bilang tugon sa Presidential Decree No. 603 o ang The Child and Youth Welfare Code, iha­hanay ng ating panukala ang mga narara­pat na programa tulad ng Child Find System upang mabigyan ng prayoridad at magawan ng Indi­vidualized Education Plan (IEP) ang mga batang gifted, may intellectual disabilities, lear­ning disabilities, emotional o behavior dis­order at multiple handicapping condition.

Dahil sa mga sitwasyong ito ay nabuo ang ating panukala sa Senado na Senate Bill No. 996 o Inclusive Education for Children and Youth with Special Needs Act of 2016.

Ang layunin nito ay ang magtayo ng Spe­cial Education (SPED) Center sa bawat school division sa buong bansa.

Sa ganitong paraan, mabibigyan ng maka­bu­luhang atensiyon at lubos na matututukan ang mga espesyal na pangangailangan ng mga mag-aaral.

Ang SPED Center ay magmimistulang re­source center na sisiguraduhing maipalala­ga­nap ang inklusibong edukasyon para sa la­hat ng mag-aaral. Kumpleto ang mga kagamitan, pasilidad, guro at kawani na may espesyalisas­yon sa SPED Education.

Ang hinahangad ng mga center na ito ay hindi lamang maibigay ang karapat-dapat na atensiyon at kalinga para sa mga espesyal na mag-aaral kundi para maiangat pa lalo ang ka­nilang potensiyal upang maging matagumpay sa kanilang pipiliing larangan at magkaroon ng magandang uri ng buhay sa lipunan na kaga­lang-galang at pinagkakatiwalaan ng lahat.

Sa bawat SPED Center ay magtatalaga ng administrator core at placement committee na binubuo ng developmental pediatrician, child psychiatrist, educational psychologist, gui­dance counselor, physical at occupational the­rapist, Braille specialist at marami pang iba.

Upang walang mapag-iwanan, sama-sama nating itaguyod at suportahan ang special edu­cation sa bawat lugar.

Pagtulung-tulungan natin ang pagkamit ng inklusibong edukasyon para sa lahat ng kaba­taang Pilipino!

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City o mag-email sa surewin.bulgar@gmail.com