34 bloke ng cocaine inanod sa surigao del sur
AABOT sa P230 milyong halaga ang narekober na 34 bloke ng hinihinalang cocaine sa baybayin ng Tandag, Surigao del Sur kahapon.
Ayon kay CARAGA Police Director Chief Supt. Gilbert Cruz, alas-6:00 ng umaga nang madiskubre ng mga mangingisda ang itim na plastic bag sa dalampasigan ng Bgy. Bongtud.
Alam na ng mga mangingisda na floating cocaine ang namataan nito tulad ng mga naunang nadiskurbe sa baybayin ng iba pang lalawigan kaya agad nilang ipinagbigay-alam sa mga awtoridad.
Nabatid pa mula kay Cruz na may dollar sign na nakasulat sa mga pinagbalutan ng cocaine.
Isinailalim na sa pagsusuri ng crime laboratory ang mga nakuhang bloke ng iligal na droga upang makumpirma kung tunay na cocaine ang laman nito.
Sa loob din ng kasalukuyang buwan ay nadiskubre ang P200 milyong halaga ng cocaine sa Siargao Island.
Mayroon ding inanod na mga bloke ng cocaine sa mga dalampasigan ng Dinagat Island, Quezon Province at Camarines Norte.
Naniniwala si PDEA Director General Aaron Aquino na ginagamit ng mga sindikato ang Pilipinas bilang transhipment point bago ipadala sa Hong Kong, Taiwan, China at iba pang kalapit-bansa.
Comments