3 PINOY, SASABAK SA TEXAS WORLD 10-BALL

MAGKAKAROON ng World 10-Ball Championships ngayong taong ito at tatlong Pinoy ang nagpaparamdam na ng kanilang kahandaan matapos angkinin ng mga ito ang tatlo sa unang limang puwesto sa pagsasara ng 125-man 2019 Texas Open 10-Ball Championship sa Round Rock, Texas.

Sinunggaban nina Alex “The Lion” Pagu­layan, Francisco “Djan­go” Bustamante at Ro­berto “Superman” Go­mez ang una, pangatlo at panglimang puwesto ayon sa pagkakasunod-sunod sa kompetisyong umakit hindi lang ng ma­rami kundi mga malulu­pit na bilyarista tulad nina 2018 Texas 10-Ball 4th placer na si Kuwaiti O­mar Alshaheen, 2018 MCC Midnight Madness king John Moora ng Ca­nada, UAE gem Jalal You­sef at 2019 Derby City Classic (DCC) 9-Ball titlist Skyler Woodward ng America.

Winalis ni Pagulayan, isang dating world champion at nagkampeon din sa 2019 MCC billiards kamakailan, ang lahat ng mga bilyaristang hu­marang sa kanyang daraanan patungo sa trono para mairehistro ang walang mantsang kampanya. Kasama sa nakatikim ng bagsik ng tubong Isabela na cue artist si Woodward (dala­wang beses niyang tinalo sa iskor na 7-5 at 7-6 ), Alshaheen (7-5), Kevin Guimond (7-1), Danny Lee (7-0), Morra (7-6), Danny Galvan (7-0) at Moaaz Khan (7-0).

Siyam na panalo at dala­wang talo ang re­kord na nagtulak kay Bustamante, isang ala­mat mula sa Tarlac, sa pangatlong puwesto sa likod ng sumegundang si Woodward, itinanghal ring 2019 DCC Master of the Table, samantalang ang markang 5-2 ay sa­pat na para sa pang­li­mang puwesto ni Gomez.

Hindi lang sa main event nagparamdam ang mga Pinoy kundi pati na rin sa mga pang­himagas na events. Sa Ring Game, si Pagula­yan rin ang nangibabaw habang nakipagsanib-puwersa si Gomez sa lady cue artist ng Amerika na si Kelly Isaac para makuha ang korona ng Scotch Doubles.