Mabahong drainage na matagal ng pinagtitiisan ng mga residente sa La Trinidad, Benguet, aksiyunan!
MASANGSANG at hindi kanais-nais na amoy ang tatlong taon na umanong tinitiis ng mga residente sa Barangay Balili, La Trinidad, Benguet. Ito ay dahil sa nangangamoy na drainage sa kanilang lugar na dinadaluyan umano ng septic waste.
Base sa kuwento ng ilang mga residente, halos araw-araw nilang naaamoy ang drainage kung saan ang mga tao ay hindi na halos makadaan malapit dito, gayundin ang mga nagtitinda na nakapuwesto malapit sa drainage ay bumili pa umano ng electric fan para lang maitaboy ang nakaduduwal na amoy.
Alam nating maraming lugar sa bansa ang walang proper waste management kaya naman imbes na maging malinis ang kapaligiran ay lalo itong dumurumi na nagreresulta sa pagkakaroon ng mabahong mga ilog at kanal.
‘Yung tipong halos mapuno na ‘yung ilog ng basura tulad ng mga plastik, diaper at marami pang iba, nakadidismaya talaga!
Samantala, ang nakababahala pa rito, ang hinihilang septic waste ay dumadaloy umano papunta sa Balili River na mayroong habang 23.81 kilometers na nagdurugtong sa Baguio at ibang municipalities ng La Union at Sablan.
Gayunman, noong nakaraang taon ay nagsumite na umano ng petisyon ang mga residente sa kanilang barangay para maresolba ito, pero ayon sa tanggapan ng Barangay Balili, naipabatid na nila ito sa municipal mayor, pero hindi pa nahahanap kung saan nagmumula ang mabahong amoy kaya hanggang ngayon ay wala pa rin silang nagagawang solusyon.
Bagama’t, hindi nila mahanap, hindi ‘yun sapat na dahilan para hayaan lang ito kahit na alam na nilang maraming residente ang maaaring manganib ang buhay, sa totoo lang, dapat hindi na ito pinatatagal pa ng mga kinauukulan, lalo na kung kalusugan na ng mamamayan ang naaapektuhan!
Kaya ang panawagan natin sa lokal na pamahalaan sa Municipal Environment and Natural Resouces (MENRO), inspeksiyunin ang lugar at tuluyan ng tuldukan ang matagal ng problema ng mga nakatira sa nasabing lugar.
Imposibleng, hindi malalaman kung saan nagmumula ang mabahong amoy kung talagang ginagawan ng paraan.
Samantala, ang paalala natin para sa lahat, ang mga lalabag sa Republic Act 9275 o Philippine Clean Water Act of 2004 kada araw ay maaaring magmulta ng P200,000, kaya kung ayaw nating maparusahan, alagaan natin ang kalikasan at magkaroon tayo ng pakialam sa kapaligiran!
Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com.
Comments