Forest fire sa benguet, 5 patay

LIMA ang nasawi sa nangyaring forest fire sa bahagi ng lupang pagmamay-ari ng Philex Mining Corporation sa Sitio Sal-angan sa Itogon, Benguet.

Sa nakarating na report sa Police Regional Office-Cordillera Administrative Region (PROCAR), naiulat ang pagkalat ng apoy ala-1:30 ng Miyerkules ng hapon at idineklarang under control makalipas ang limang oras.

Na-trap sa nasusunog na gubat at hindi na nagawang makaligtas sina Leon Mocate, Dante Molina, Noel Degyem, Marlon Guinigin at Dexter Labasa, pawang mga empleyado at forester ng nasabing kumpanya.

Sinasabing nasa loob ng kanilang gusaling tinutuluyan na Forestry Department ang mga biktima habang nasa kasagsagan ng sunog.

Samantala, nasa lima hanggang anim na ektarya ang nasunog na kagubatan.

Iniimbestigahan pa ng mga awtoridad ang sanhi ng insidente.