105-day maternity leave, pirmado na | BAKASYON GRANDE KAY MOMMY

GANAP nang batas ang Expanded Maternity Leave Bill matapos lagdaan ni Pa­ngulong Rodrigo Duterte.

Ito ang kinumpirma ni dating Special Assistant to the President Christopher ‘Bong’ Go.

Sa ilalim ng batas, mabi­bigyan ng 105 araw na ba­kasyon nang may bayad ang mga nanay na nagtatra­baho sa gobyerno at pribadong sektor na nagsilang ng kani­lang anak.

May opsiyon naman ang mga nanay na mag-ex­tend pa ng bakasyon ng pani­bagong 30 araw pero, wala na itong bayad.

Para naman sa mga single mother, mabibigyan ang mga ito ng karagdagang 15 araw na bakasyon.

Kumpiyansa ang Pa­lasyo na magbibigay ito sa mga nanay ng sapat na pa­nahon para makapaghanda at makapagpahinga bago o pagkatapos nilang manganak.

Magandang pagkaka­taon din aniya ito para maka­pag-bonding nang mas mata­gal ang nanay at ang sanggol at mabibigyan ng mas ma­ta­gal na panahong breast­fee­ding sessions ang mag-ina.

Kaugnay nito, nagpasa­la­mat si Deputy Speaker Pia Cayetano kay Pangulong Du­terte sa paglagda sa nasa­bing panukala.

“Ang mas mahabang araw ng maternity leave ay makapagbibigay ng pana­hon para mga nanay na mag­pagaling pagtapos ma­nganak at maalagaan pa ang kanilang bagong pa­nga­nak na sanggol,” ani Cayetano.

Sinabi mismo ng pangulo noong inendorso niya si Ca­yetano sa rally ng PDP-La­ban sa Bulacan nitong huling linggo na handa siyang ma­kinig sa mungkahi ng baba­eng mambabatas pagdating sa pagtugon sa mga prob­lema ng bansa.

“Ang panukala tungkol sa maternity leave ay tila isang sanggol na hinintay kong maipanganak. Sa ma­habang panahon, simula pa noong nasa Senado pa ako, talagang pinagsikapan ko ang pagpasa ng panuka­lang-batas na ito,” paglilinaw ni Cayetano.

Matapos ang mahigit da­lawang dekada, ngayon lang ulit nakapagpasa ng batas na nagdaragdag ng benepisyo sa mga kababaihang nagda­da­lantao.

Matatandaang, ang Re­public Act 7322 o “Act Increasing Maternity Bene­fits in favour of Women Wor­kers in the Private Sector” ay naging batas noong Marso 1992.

Ang bagong batas sa maternity leave ay itinutu­ring na maagang regalo ni Pangulong Duterte para sa pagdiriwang ng Araw ng Kababaihan sa Marso, lalo na para sa mga working mother.