Mag-live-in partner, 1 pa timbog sa droga

TATLONG hinihinalang drug personalities kabilang ang mag-live-in partner ang naaresto sa buy-bust operation sa Malabon City, kamakalawa ng gabi.

Kinilala ang mga naarestong suspek na sina Rosalia Gipaya alyas Cel, 41; ka-live-in nitong sina Ronie Borres alyas Agao, 41, pusher, kapwa ng Caloocan City at Elizabeth Baruela, 45, ng Malabon City.

Alas-11:50 ng gabi nang isagawa ng mga operatiba ng Station Drug Enforcement Unit (SDEU) sa pangunguna ni P/Insp. Rolando Domingo ang buy-bust operation kontra sa mga suspek sa Tumaris St., Bgy. Tugatog.

Matapos iabot ng mga suspek ang sachet ng shabu sa pulis na nagpanggap na buyer kapalit ng P300 marked money, agad itong nagbigay ng signal sa kanyang mga kasamahan.

Lumusob ang back-up na mga operatiba at sinunggaban ang mga suspek at nang kapkapan ay narekober pa sa mga ito ang pitong plastic sachets na naglalaman ng hindi pa mabatid na halaga ng hinihinalang shabu at buy-bust money.