Estudyanteng anti-government | GOODBYE SCHOLARSHIP

NANAWAGAN kay Pangulong Rodrigo Duterte si National Youth Commis­sion (NYC) Chairman Ro­nald Cardema na ba­wiin ang scholarships ng mga estud­yanteng ‘anti-government’.

Partikular na tinukoy ni Cardema ang mga estud­yanteng sumasapi sa Com­munist Party of the Philip­pines (CPP), New People’s Army (NPA) at National Democratic Front (NDF).

Ani Cardema, dapat na magpalabas ng Executive Order si Pangulong Duterte para alisan ng scholarships ang lahat ng mag-aaral na ‘anti-government’.

Kasabay nito, hinimok din niya ang mga opisyal ng Sangguniang Kabataan (SK), Reserve Officers Trai­ning Corps (ROTC), Citizen Army Training (CAT) na i-report sa pamahalaan ang mga pinaniniwalaang sang­kot sa CPP-NPA-NDF sa kani-kanilang lugar na nasa­sakupan.

Gayunman, iginiit ng Malacañang na dapat may­roong kongkretong ebiden­siya na bahagi ang mga es­tudyante ng grupo na nagpa­pabagsak sa gobyerno bago sila tanggalan ng scholar­ships.

Ayon kay Presidential Spokesman Salvador Pa­nelo, magiging maingat ang gob­yerno hinggil sa naturang usapin bago patawan ng ma­rahas na hakbang ang mga estudyante. Kung suspetsa lamang aniya ay ma­labong umubra ito ayon kay Panelo.

Karapatan umano ng mga mag-aaral na ipahayag ang kanilang mga saloobin sa pamamagitan ng kilos-protesta bilang freedom of expression ngunit, maliban na lamang aniya kung sila ay sumasama sa mga nag­papa­bagsak sa kasalukuyang ad­ministrasyon.