2 timbog sa 4-kilo ng marijuana

APAT na kilo ng hinihi­nalang pinatuyong dahon ng marijuana na tina­tayang nasa P120,000 ang halaga ang nakumpiska sa dalawang tulak ng droga na naaresto sa buy-bust operation sa Valenzuela City, kahapon ng ma­daling-araw.

Kinilala ni Valenzuela Police Chief Sr. Supt. David Nicolas Poklay ang mga naarestong suspek na sina Johnedel Geronimo, 27, at Methuselah Para­dero, 28, kapwa nasa drug watchlist ng pulisya.

Ayon kay Sr. Supt. Poklay, ikinasa ng mga operatiba ng Station Drug Enforcement Unit sa pangunguna ni PSI Segundino Bulan, Jr., ang buy-bust operation kontra sa mga suspek sa 7th Street corner Fortune Driver Fortune Village 5, Bgy. Parada, ala-1:00 ng madaling-araw.

Nagawang makabili ni PO1 Gary Garcia na nagpanggap na poseur-buyer ng isang pack ng marijuana na nagkaka­halagang P500 kay Geronimo sa loob ng pulang Toyota Innova na may conduction sticker (YY 8156) at nang magbigay ito ng signal sa mga kasamahan, agad lumusob ang back-up na mga operatiba saka inaresto ang mga suspek.

Narekober kay Gero­nimo ang P2,000 habang kay Paradero naman nakuha ang marked money.

Nang halughugin ang loob ng sasakyan, apat na bloke ng pinatuyong dahon ng marijuana na tumi­timbang ng apat na kilo ang nakuha ng mga operatiba na dadalhin sa crime laboratory sa Camp Crame habang sasam­pahan na ng kaukulang kaso ang dalawang nasakote.