After ng ambush sa EDSA, 2 patay | RIDING-IN-TANDEM, BAWAL

KASUNOD ng pamamaril sa EDSA na ikinasawi ng dalawa katao, pinag-aaralan ng Mandaluyong City police na irekomenda sa ibang siyudad at maging sa EDSA ang kanilang ordinansa na nagbabawal sa ‘men riding-in-tandem’.

“Isa sa mga recommendation naming possible action to preempt this one... we will recommend na ‘yung riding-in-tandem na ordinance sa Mandaluyong may be replicated by other cities, at the same time applicable sa EDSA,” pahayag ni Senior Superintendent Moises Villaceran sa isang panayam.

Ang tinutukoy ng opisyal ay ang Mandaluyong City Ordinance Nos. 550 at 595, kung saan ipinagbabawal ang parehong lalaki na sakay sa motorsiklo maliban na lang kung magkamag-anak.

“The MMDA (Metropolitan Manila Development Authority) should push to implement this,” dagdag pa ni Villaceran.

Matatandaang, dalawa ang patay sa insidente ng pamamaril sa EDSA malapit sa Reliance Street sa Mandaluyong City, kamakalawa ng hapon.

Pinagbabaril ng riding-in-tandem ang van kung saan sakay ang mga nasawi na sina Jose Ruiz Yulo, 62, negosyante at ang drayber na si Allan Nomer Santos, 51. (BRT)