Un-announced trip | DIGONG NAG-HONG KONG

KINUMPIRMA ni dating Special Assistant to the President Christopher ‘Bong’ Go na muling nagtungo sa Hong Kong si Pangulong Rodrigo Duterte kasama ang kanyang pamilya noong Biyernes ng gabi.

Ayon kay Go, kasama ni Pangulong Duterte ang kanyang partner na si Honeylet Avanceña at ang anak nilang si Kitty.

“Totoo po na pumunta ng Hong Kong si Pangulong Duterte na kasama ang long-time partner nya na si Ma’am Honeylet Avanceña at anak nila na si Kitty para sa isang personal na biyahe,” ani Go.

“It was actually Kitty who requested her father for the trip, as a gift. Nagawa na ito nila noon kahit nu’ng mayor pa ng Davao City si PRRD. The weekend getaway is for rest and recreation,” dagdag pa ni Go.

Ayon naman kay Presidential Spokesperson Salvador Panelo, ang Hong Kong trip ni Duterte ay para ipagdiwang ang birthday ni Avanceña.

“Yes, he is in HK with Honeylet. It’s the latter’s birthday today,” ani Panelo.

Samantala, bago tumulak pa-Hong Kong, itinalaga ni Pangulong Duterte si Executive Secretary Salvador Medialdea bilang officer-in-charge ayon kay Go. Umuwi ang presidente sa bansa kasama ang kanyang pamilya kahapon, Linggo.

Matatandaang, noong October 2018 nang magkaroon din ng un-announced trip si Pangulong Duterte kasama ang kanyang pamilya.