KOOPERATIBA NADALE NG KAWATAN

TINATAYANG nasa higit P300,000 cash ang natangay ng Akyat-Bahay Gang sa isang malaking kooperatiba sa Bgy. Ibabao, Cuenca, Batangas.

Batay sa ulat, sa pagitan ng alas-12:00 ng hatinggabi hanggang alas-2:00 ng madaling araw nang isinagawa ang panloloob sa Ibabao Multi-purpose Cooperative.

Umakyat sila sa bubungan saka winasak ang kisame nito at pumasok. Mabilis nilang tinungo ang main vault kung saan naroroon ang nasabing halaga.

Patuloy pa ang isinasagawang pag-iimbestiga ng pulisya at kung may CCTV footage sa naturang lugar upang agad maresolba ang naturang insidente.