MANCEBO NG SPAIN, HARI NG RONDA STAGE 1

ILOILO CITY - Mas malakas sa akyatan, pero nakaungos sa patag si Tour de France veteran Francisco Mancebo ng Spain upang sikwatin ang panalo sa 197.6-kilometer Stage One ng LBC Ronda Pilipinas 2019 na nagsimula sa Iloilo City Hall at nagtapos sa Megaworld Festive Walk Mall dito kahapon.

Inirehistro ni 42-year-old Mancebo na dala ang Matrix Powertag Japan ang limang oras, pitong minuto at dalawang segundong pagtatapos habang dumating na segundo si defending champion Ronald Oranza ng Navy-Standard Insurance.

Tumersero si 7-Eleven Cliqq-Air21 by Roadbike Philippines rider Dominic Perez.

Magkapareho ang naitalang oras nina 26-anyos Oranza at Perez, may tatlong minuto at 52 segundo ang kanilang hahabulin kay Mancebo pagsalang ng 101.8km Guimaras-Guimaras Stage Two ngayong araw. “For the moment, I’m happy with the victory. For us, its good and we’ll see what happen in the race,” saad ni Mancebo.

Pumang-apat si two-time Ronda champion John Paul Morales ng Phl Navy sa event na inorganisa ng LBC at suportado ng MVP Sports Foundation, Versa 2-Way Radio, Juan Movement Partylist, Joel P Longares Foundation, Standard Insurance, Department of Tourism, Department of Environment and Natural Resources, Iloilo City at Province of Guimaras. (ATD)