Doktor nabundol ng SUV, dedo

TODAS ang 32-anyos na doktor makaraang mabundol ng humaharurot na SUV sa Santiago, Agusan del Norte, kamakalawa ng gabi.

Dead-on-arrival sa Cabadbaran District Hospital ang biktimang si Dr. Zuriele Arambulo.

Nakababa na umano ang biktima sa sinakyang pampasaherong bus subalit, bigla itong nahagip ng SUV habang tumatawid sa kalsada.

Sa lakas ng pagkakabangga, tumilapon ng ilang metro ang biktima bago bumagsak sa sementadong kalsada.

Nagtamo ng matinding pinsala sa ulo at katawan ang doktor na siyang dahilan ng pagkamatay nito habang ang sasakyan na imbes na huminto ay mabilis na tumakas.

Nabatid na ang biktima ay kade-deploy lang bilang isa sa mga tinaguriang ‘Doctor to the Barrios’ sa rehiyon at kahapon ang kanya sanang unang araw sa duty na magbibigay ng libreng serbisyo sa pangkalusugan sa mga residente.

Ang ‘Doctor to the Barrios’ ay isang programa ng Department of Health kung saan nagpapadala ng mga volunteer doctor sa mga lugar kung saan may kakulangan sa mga health worker.

Patuloy naman ang follow-up operation ng pulisya para makilala at matukoy ang driver na nakabangga sa doktor.