ALTAS, KAMPEON SA NCAA 94 VOLLEYBALL

WINALIS ng University of Perpetual Help ang College of St. Benilde, 23-25, 25-17, 25-17, 25-23 upang sikwatin ang korona sa NCAA Season 94 men’s volleyball competition kahapon sa FilOil Flying V Centre sa San Juan.

Napalaban ng todo ang Altas sa fourth frame, naging matatag sa dulo upang pahabain sa 12th title overall ang kanilang pamamayagpag.

Nagtala si two-time Most Valuable Player Joebert Almodiel ng 19 points habang bumakas si Ridzuan Muhali ng 19 markers at 11 digs para sa Las-Pinas based squad Perpetual Help.

Sinelyuhan ni Finals MVP Almodiel ang game 2 sa kanilang best-of-three finals matapos isalpak ang game-winning hit. Nasagad sa fifth set sa Game 1 kung saan nanaig ang Altas laban sa Blazers, 23-25, 25-20, 23-25, 25-23, 15-12.

Inirehistro nina Ronniey Adviento at Rookie of the Year Ruvince Abrot ng tig-12 puntos para CSB habang kumana si Francis Basilan ng 10 puntos.

Samantala, patuloy din ang pamamayagpag ng Junior Altas matapos kalusin ang Letran, 25-19, 30-28, 25-17 sa Game 2 finals.

Limang sunod na taon ng naghahari ang Junior Altas sa high school division.

Samantala, itinanghal na MVP ng women’s division si Necole Ebuen ng two-time defending champion Arellano University dahil sa impresibo niyang performance. Natanggap ng Lady Chiefs ang parangal kahapon bago ang Game 2 ng women’s best-of-three Finals sa pagitan ng Arellano U at University of Perpetual Help sa FilOil Flying V Centre sa San Juan.

Nasungkit din ni Ebuen ang Best Opposite Spiker award tanging Arellano player na nasa listahan ng individual awardees ngayong taon. Ang iba pang nagwagi ay sina Cindy Imbo ng University of Perpetual Help (1st Best Outside Spiker); San Beda University’s Cesca Racraquin (2nd Best Outside Spiker), Daryl Racraquin (Best Libero) at Lynne Matias (Best Setter and Rookie of the Year); Rachel Austero ng College of St. Benilde (1st Best Middle Blocker) at Bien Juanillo ng Lyceum of the Philippines University (2nd Best Middle Blocker). Patuloy ang pagdomina ni outside hitter Joebert Almodiel sa men’s division sa ikalawang straight MVP recognition. Samantala, habang isinusulat ito ay naglalaban pa para sa Game 2 finals ang women’s volleyball team sa pagitan ng Altas at ng Arellano University Lady Chiefs. (ATD)