FIDE MASTER CAUSO, CHAMP SA THAI CHESS

NAGPARAMDAM ang chess savy na si FIDE Master Deniel Causo ng Pilipinas matapos nitong maitakas ang korona ng isang torneo at maisalba ang huling upuan sa podium ng isa pang paligsahan kama­kailan sa Thailand.

Isang gitgitang karera ang nasaksihan sa pagitan nina Causo at ng Thai na si Thanadon Kulpruethanon sa Northern Open Rapid Chess Championship mata­pos silang kapwa maka­kulekta ng 5.5 puntos pag­katapos ng pitong rounds ng paspasang ahedres.

Nang pairalin ang unang tuntunin sa tiebreak, patas pa rin ang dalawa (1.0-1.0). Sa pagpasok sa eksena ng pangalawang tiebreak, na­kuha na ng Pinoy ang kam­peonato (31.0-28.5) at na­kuntento sa segunda ang Thai sa kompetisyong inor­ganisa ng Intarachit Chess Club.

Ginawa ring pasaporte ng Pinoy patungo sa trono ang mga panalo laban kina Phumrapee Weerapan (Round 1), Jonathan Bo­demar (Round 2), Sornsa­wan Singromroj (Round 3) at kapwa Pinoy na si Henry Calacday (round 7) at ang mga hatian ng puntos sa harap ng hamon nina Mor­tensen Kongshjelm Soren ng Denmark (Rround 6), Kavin Nattavutthisit (Round 5) at Kulpruethanon (Round 4).

Samantala, sa 2019 Thammasat University Ra­pid Chess Tournament, pu­mangatlo si Causo dala ang rekord na 5 puntos pagka­tapos ng anim na rounds.

Isa pang Pinoy si 12th seed Joseph Winston Silva, ang hinirang na hari dahil sa 5.5 puntos na koleksiyon nito samantalang si local bet Tinnakrit Arunnun Tapanich (5.0 puntos) ay nakapag­poste ng bridesmaid finish sa labanang umakit ng 56 na disipulo ng ahedres mula sa USA, Canada, Germany, Austria, Pilipinas at Thai­land.